சட்ட விரோத கல்குவாரி எதிர்ப்பு இயக்கம்

கல் குவாரி தொடர்பாக பல்வேறு முறைகேடுகள் – குவாரியில் நடக்கும் விபத்து என்ற பெயரில் கொலைகள், குவாரி உரிமையாளர்களால் நடத்தப்படும் படுகொலைகள் தொடர்ந்து அம்பலப் படுத்தப்பட்டு வரும் நிலையில்….

09-02-2023 வியாழக்கிழமை காலை 10.00 மணிக்கு அக்கலாம்பட்டி 1 கல்குவாரி, மாலை 03.00 மணிக்கு கோக்கலை 4 கல்குவாரிக்கு, நாமக்கல் மாவட்ட ஆட்சித்தலைவர் தலைமையில், 5 கல் குவாரி அமைப்பதற்காக ,
நாமக்கல் மாவட்ட ஆட்சித்தலைவர் அலுவலக இணைப்பு கூட்ட அரங்கில், (கோக்கலை சிவக்குமார், ராஜா, ராமாயி, பழனிச்சாமி என4 கல்குவாரி -அக்கலாம்பட்டி செல்வராஜ் கல்குவாரி ) அமைப்பதற்கான
கருத்து கேட்பு கூட்டம் , நடைபெற உள்ளது.

இந்த கருத்து கேட்பு கூட்டத்தில் தமிழக சுற்றுச்சூழல் பாதுகாப்பு இயக்க ஒருங்கிணைப்பாளர் முகிலன்,சட்டவிரோத கல்குவாரி எதிர்ப்பு இயக்கம் ஒருங்கிணைப்பாளர்கள் தோழர். சண்முகம் -விஜயன், பூசன், சமூக செயல்பாட்டாளர் வழக்கறிஞர் செந்தில்குமார், தோழர். பொன்னரசு, குன்னமலை குழந்தைவேல், சாமானிய மக்கள் நலக் கட்சி பொதுச்செயலாளர் முனைவர் .குணசேகரன், சூழலியல் செயல்பாட்டாளர் மோகன்ராஜ்-
கொ. நாகராஜன், லா பவுண்டேஷன் வாசுதேவன், சாமானிய மக்கள் நலக்கட்சி நாமக்கல் மாவட்ட செயலாளர் தியாகராஜன்
உள்ளிட்ட பல்வேறு அமைப்பு தோழர்கள், சூழலியல் செயற்பாட்டாளர்கள், தொடர்ந்து அடக்குமுறைக்கு அஞ்சாது சட்டவிரோத கல்குவாரிகளுக்கு எதிராக போராடி பல்வேறு நிலைமைகளை மாற்றி வரும் கோக்கலை ஊர் பொதுமக்கள் கலந்து கொள்ள இருக்கின்றனர்.

கடந்த ஓராண்டாக சுற்றுச்சூழல் செயல்பாட்டாளர்களின் தொடர் செயல்பட்டால் தற்போது திருப்பூர் மாவட்டம் ஊத்துக்குளி வட்டத்திலிருந்த 64 +18= 82 கல்குவாரிகளும் முறைகேடாக இயங்குகிறது என்று உயர் நீதிமன்றமே அனைத்தையும் மூடி, தவறுக்கு துணை நின்ற அதிகாரிகள் மீது நடவடிக்கை எடுக்க உத்தரவிட்டுள்ளது. திருநெல்வேலியில் இயங்கிய 54 குவாரிகளும் சட்ட விரோதமாக இயங்குகிறது என்றும் 19 கல் குவாரிகள் இயங்க தகுதியில்லை என்றும் மற்ற குவாரிகளுக்கு நூற்றுக்கணக்கான கோடி ரூபாய் அபராதம் விதிக்கப்பட்டும், அனைத்து குவாரிகளும் முறைகேடுகள் இருக்கிறது என்று அரசு அமைக்க குழுவின் ஆய்வில் கண்டுபிடிக்கப்பட்டு உள்ளது.

திமுக தலைவர் மு.க. ஸ்டாலின் அவர்கள், தங்களது 2021 சட்டமன்ற தேர்தல் அறிக்கையில், எண்ணற்ற முறைகேடுகள் நடந்து அரசுக்கு வருவாய் இழப்பு ஏற்படுவதால் கிரானைட் குவாரிகளை இனி அரசே ஏற்று நடத்தும் என தெரிவித்திருந்த நிலையில்* நாமக்கல்லில் கல் குவாரிக்காக கருத்து கேட்புக் கூட்டம் இன்று நடைபெற உள்ளது.

சட்டவிரோத கல்குவாரிகளை கடுமையாக ஆதாரபூர்வமாக எதிர்ப்பதாலும், அதனை ஆதாரபூர்வமாக பொதுவெளியில் முன் வைப்பதாலும், சுற்றுச்சூழல் செயற்பாட்டாளர்களுக்கு, நாமக்கல்- மரப்பரை;
கரூர்-பரமத்தி காட்டு முன்னூர், கோவை – கிணத்துக்கடவு 10 முத்தூர் உள்ளிட்ட பல இடங்களில், கொலை மிரட்டல், உள்ளிட்ட பல்வேறு அச்சுறுத்தல்கள், தாக்குதல் முயற்சிகள் குவாரி உரிமையாளர்களாலும் அவர்களது அடியாட்களாலும் ஏற்பட்டது.

சென்ற மாதம் நாமக்கல் மாவட்ட ஆட்சித் தலைவர் அலுவலகத்தில் நாமக்கல் மாவட்ட ஆட்சித்தலைவர் முன்பாகவே, கொண்டம நாயக்கன்பட்டி கல்குவாரி கருத்து கேட்பு கூட்டத்தில் கல்குவாரி உரிமையாளர்களால் அழைத்து வரப்பட்ட அடியாட்களால், சட்ட விரோத கல்குவாரி எதிர்ப்பு இயக்க ஒருங்கிணைப்பாளர் சண்முகம் அவர்கள் தாக்கப்பட்டார்.

கரூரில் நான்கு மாதம் முன்பு விவசாயி ஜெகநாதன் குவாரி உரிமையாளர்களால் வாகனம் ஏற்றி படுகொலை செய்யப்பட்டார்.

சில மாங்களுக்கு முன்பு கூட ஈரோடு மாவட்டம் சென்னிமலையில், எக்கட்டாம் பாளையம் கிராமத்தில் உள்ள கல்குவாரி முறைகேடுகளை எதிர்த்து ஆதாரத்தோடு முன்வைத்து வந்த தமிழ்ச்செல்வன் என்பவர், குவாரி உரிமையாளர்கள் ஏவிவிட்ட கூலிப்படையால் கொலைவெறி தாக்குதல் நடத்தப்பட்டு உயிர்தப்பி சிகிச்சை பெற்றார்.

அனைத்து மாவட்டங்களிலும், கடந்த பல ஆண்டுகளாக மிகப்பெரும் சட்டவிரோதமாகவும், சுற்றுச்சூழலை பாதித்தும் குவாரி நடத்தி வரும் கல்குவாரி உரிமையாளர்களால், இன்றைய கோக்கலை – அக்கலாம்பட்டி கல் குவாரிக்காக நடைபெறும் கருத்து கேட்பு கூட்டத்தில் பங்கேற்கும் சுற்றுச்சூழல் செயல்பாட்டாளர்களுக்கு என்ன நடக்கும் என்று சொல்ல முடியாத அவல நிலையே உள்ளது.

எனவே அனைத்து பத்திரிக்கையாளர்களும்/காட்சி ஊடக நண்பர்களும் இந்த கருத்து கேட்பு கூட்டத்தில் கலந்து கொண்டு, அங்கு நடக்கும் உண்மையை உலகிற்கு எடுத்துச் சொல்ல வேண்டும் எனக் கேட்டுக் கொள்கிறோம்.

ந.சண்முகம்,
தோழர் பூசன்,
தோழர். குழந்தைவேலு
ப. பொன்னரசு
சு.விஜயன்,
ஒருங்கிணைப்பாளர்கள்,
சட்ட விரோத கல்குவாரி எதிர்ப்பு இயக்கம்

97919- 78786
73734 – 53038

அமெரிக்காவைச் சேர்ந்த ஹிண்டன்பர்க் முதலீட்டு ஆய்வு நிறுவனம், பங்குச்சந்தையில் பெரிய கார்ப்பரேட் நிறுவனங்கள் மேற்கொள்ளும் தில்லுமுல்லுவை அம்பலப்படுத்தி வருகிறது. தற்போது அந்த நிறுவனம் கடந்த வாரம் ஆய்வறிக்கை ஒன்றை வெளியிட்டது.

அதில், “உலகின் 4ஆவது பெரும் பணக்காரரும், ஆசியாவின் நம்பர்-1 பணக்காரருமான அதானியின், அதானி குழும நிறுவனத்தின் முறைகேடுகளை அம்பலாக்கியது. அந்த அறிக்கையில், கடந்த இரண்டு ஆண்டுகளாக நடத்திய ஆய்வில், அதானி குழுமம் பங்குச் சந்தையில் பல்வேறு முறைகேடுகளைச் செய்து, ரூ.17.80 லட்சம் கோடிக்கு மோசடி செய்துள்ளதாக குற்றம் சாட்டி உள்ளது. ‘அதானி குழுமத்தின் மொத்த சொத்து மதிப்பு தோராயமாக 120 பில்லியன் டாலர் (ரூ.9.84 லட்சம் கோடி). இதில், 100 பில்லியன் டாலர் (ரூ.8.2 லட்சம் கோடி) கடந்த மூன்று ஆண்டில் ஈட்டப்பட்டுள்ளது.

இந்தக் காலக்கட்டத்தில் அதானி குழுமத்தின் பட்டியலிடப்பட்ட ஏழு நிறுவனங்களின் பங்குகள் 819 சதவீதம் வளர்ச்சி அடைந்துள்ளது. ஆனால், பங்குச்சந்தையில் மோசடி செய்து, போலி நிறுவனங்கள் மூலமாக அதானி நிறுவனம் பணத்தை முறைகேடாக ஈட்டியுள்ளது. இதற்காக தாராள வரிச்சலுகை உள்ள மொரீசியஸ், ஐக்கிய அரபு எமிரேட், கரீபியன் தீவுகள் போன்ற நாடுகளில் போலி நிறுவனங்களை தொடங்கியுள்ளது. இவற்றை அதானி குழுமத்தில் உயர் பதவிகளில் உள்ள அதானியின் உறவினர்கள் நிர்வகித்து வருகின்றனர். மொரீசியசில் மட்டுமே 38 போலி நிறுவனங்களை அதானி குடும்பத்தினர் நடத்தி வருகின்றனர்.

மேலும், அதானி குழுமம் வரம்புக்கு மீறி கடன் பெற்றுள்ளது. இதனால் நிலையற்ற தன்மையில் அதானி குழும நிறுவனங்கள் உள்ளன” என ஆய்வறிக்கையில் குறிப்பிடப்பட்டு உள்ளது.

அதுமட்டுமின்றி, அதானி குழுமத்தின் போலி நிறுவனங்கள் குறித்த புகைப்பட ஆதாரங்களையும் வெளியிட்டுள்ளது. அதோடு, அதானி குழுமத்தின் மோசடி தொடர்பாக 88 கேள்விகளையும் ஹிண்டன்பர்க் எழுப்பியுள்ளது.

இந்தக் குற்றச்சாட்டுகளை மறுத்துள்ள அதானி குழுமம் கடுமையான எதிர்ப்பு தெரிவித்து, வழக்கு தொடர உள்ளதாக எச்சரித்து உள்ளது.

கருப்புப் பண ஒழிப்பு பற்றி பேசும் ஒன்றிய பாஜக அரசு, தனக்கு நெருக்கமான நிறுவனத்தின் இந்த சட்டவிரோதச் செயல்களைப் பார்த்து கண்ணை மூடிக் கொண்டு இருக்கிறதா? இந்த குற்றச்சாட்டுகளை பெயரளவில் விசாரிக்காமல் முழுமையாக செபி விசாரிக்குமா?

அதானி குழுமத்தின் பங்கில் 8 சதவீதத்தை, அதாவது ரூ.74,000 கோடி பங்குகளை எல்ஐசி வைத்துள்ளது. மேலும், அதானி குழுமத்தின் கடனில் 40 சதவீதத்தை ஸ்டேட் பேங் ஆப் இந்தியா வங்கி வழங்கி உள்ளது. எனவே, அதானி குழுமம் முறைகேடு செய்து தனது பங்கு மதிப்பை தன்னிச்சையாக உயர்த்தி, அவற்றை அடமானமாக வைத்து, எஸ்பிஐ உள்ளிட்ட வங்கிகளில் கடன் பெற்றதா? என்பது குறித்து இந்திய ரிசர்வ் வங்கி விசாரணை நடத்த வேண்டும். இது உண்மையாக இருந்தால் எஸ்பிஐ உள்ளிட்ட வங்கிகளின் நிதிநிலை பாதிக்கப்படும் அபாயம் உள்ளது.

எனவே, பொதுநலன் கருதி இந்திய பங்குச்சந்தை ஒழுங்கமைப்பான செபி மற்றும் ரிசர்வ் வங்கி ஆகியவை உரிய விசாரணை நடத்த வேண்டும் என்று வலியுறுத்துகிறேன்.

வைகோ
பொதுச்செயலாளர்
மறுமலர்ச்சி தி.மு.க
‘தாயகம்’

நாட்டை நாசமாக்கும் கூட்டாளிகள் – 5

2014-ல் நாடாளுமன்ற பொதுத் தேர்தலுக்காக மோடி,  சுமார் 150 பரப்புரைக் கூட்டங்களில் கலந்து கொண்டார், கிட்டத் தட்ட 2.4 லட்சம் கிலோ மீட்டர் பயணித்தார், அதற்காக அதானி குழும நிறுவனம்  கர்னாவதி ஏவியேஷனின் விமானத்தை மோடிக்கு வழங்கியது.

மோடி குஜராத் முதல்வராக இருந்த போது அதானிக்கு செய்த உதவிக்காக அதானி மோடிக்கு செய்த கைமாறு இது.

மக்களவைத் தேர்தல் முடிவுகள் வெளியான அதே நாளில்,  ஒடிஸாவில், கிழக்குக் கடற்கரைப் பகுதியில் உள்ள ‘தாம்ரா போர்ட்’ துறைமுகம் ரூ.5,500 கோடிக்கு அதானியின் ‘அதானி போர்ட்ஸ்’ நிறுவனத்தின் கைகளுக்குச் சென்றது.

அடுத்த மூன்று மாதங்களில், உடுப்பியிலுள்ள ரூ. 6,000 கோடி மதிப்புள்ள 1,200 மெகாவாட் அனல் மின் உற்பத்தி நிலையத்தை ‘லான்கோ இன்ஃப்ரா’ நிறுவனத்திடமிருந்து அதானி குழுமம் வாங்கியது.

அடுத்த மூன்று மாதங்களில், ரூ. 4,200 கோடி மதிப்புள்ள 600 மெகாவாட் மின் உற்பத்தி நிலையத்தை ‘அவந்தா’ நிறுவனத்திடமிருந்து அதானி குழுமம் வாங்கியது. இதன் மூலம் 11,040 மெகாவாட்டாக அந்நிறுவனத்தின் மின் உற்பத்தித் திறன் உயர்ந்தது. நாட்டின் மிகப் பெரிய தனியார் மின் உற்பத்தி செய்யும் குழுமமாக  அதானி குழுமம் உருவாகியது.

செப்டம்பரில் இன்னொரு சாதனையையும் அவர் படைத்தார். இந்தியாவின் ‘டாப் 10 பணக்காரர்கள்’ பட்டியலில் நுழைந்தார்.

அமெரிக்கா, ஆஸ்திரேலியா, பிரேசில், ஜப்பான் , இஸ்ரேல் என்று  மோடி எந்த நாடுகளுக்குச் சென்றாலும் அதில் அதானியும் ஒரு அங்கமாக இருந்தார்.

மோடியுடன் வெளிநாடுகளுக்குப் பயணம் செய்த அதானிக்கு இஸ்ரேல் நிறுவனத்துடன் இணைந்து, இந்திய ராணுவத்திற்கு ட்ரோன் விமானங்கள் செய்யும் ஒப்பந்தம் கிடைத்தது.

2014ஆம் ஆண்டு நரேந்திர மோடி இந்தியாவின் பிரதமர் என்கிற முறையில் பிரிஸ்பன் நகரத்தில் நடந்த ஜி20 உச்சி மாநாட்டில் கலந்து கொண்டார். அவரோடு கெளதம் அதானியும் சென்றார்.

அதானிக்கு மிகப்பெரிய நிலக்கரி சுரங்கம் ஆஸ்திரேலியாவில் கட்டுவதற்கான அனுமதியைப் பெற்றுத் தந்தார்.

அந்த நிலக்கரிச் சுரங்கம் அமைக்கப்படும் இடத்தின் மீது உள்ள எதிர்ப்பு, அதானி மீதுள்ள வாராக்கடன் குற்றச்சாட்டுகள் முதலியவற்றைக் கணக்கிட்டு, வெளிநாட்டு வங்கிகள் அவருக்குக் கடன்தர மறுத்தபோது,
அதற்கான கடனை பொது வங்கியான ஸ்டேட் பாங்க் ஆப் இந்தியாவிடமிருந்து ஏறத்தாழ 6,000 கோடி ரூபாய் பெற்றுக் கொடுத்தார்.

நிலக்கரி சுரங்கம் வாங்கிக் கொடுத்த கையோடு ஒரு டன் ரூ.16,700 என்ற விலையில் 25 லட்சம் டன் ரூ.4,035 கோடி மதிப்புள்ள நிலக்கரியை இறக்குமதி செய்வதற்கான ஒப்பந்தம் அதானி நிறுவனத்திற்கு வழங்கப்பட்டது. இதன் விளைவு நிலக்கரி மூலம் மின்உற்பத்தி செய்வோர் ரூ.20,000 என்ற விலையில் இறக்குமதி நிலக்கரியை வாங்க வேண்டிய நிலைக்கு தள்ளப்பட்டனர். இது வழக்கமாக டன் ரூ.1700 முதல் ரூ.2000 என்ற விலையில் வாங்கும் உள்நாட்டு நிலக்கரியை விட 7 முதல் 10 மடங்கு விலை அதிகமானது.

அதிக விலை கொடுத்து நிலக்கரியை வாங்க எல்லா மாநில அரசுகளுக்கும் நிர்பந்தம் கொடுக்கப்பட்டது

உதாரணத்திற்கு டெண்டரே விடாமல், இந்தோனேசியா மற்றும் ஆஸ்திரேலியாவிலிருந்து அதானி என்டர்பிரைசஸ் இறக்குமதி செய்த  நிலக்கரியை டன்னுக்கு 5008.45 ரூபாயும், ஸ்ரீ ராயல் சீமா என்ற கம்பெனிக்கு டன்னுக்கு 4936.25 ரூபாயும், யாசின் இம்பெக்ஸ் இந்தியாவிற்கு டன்னுக்கு 5098 ரூபாயும் கொடுப்பதற்கு கடந்த அ.தி.மு.க அரசு மோடியின் அழுத்தத்தால் வாங்குவதற்கு ஒப்பந்தம் போட்டது.

அதற்கு முன்பு “கோல் இந்தியா”- விடமிருந்து ஒரு டன் நிலக்கரி 2 ஆயிரம் ரூபாய்க்கு வாங்கியது முக்கியமானது.

சட்டீஸ்கர் மாநிலத்தின் ராய்கர் மாவட்டத்தில் இருக்கும் நிலக்கரி சுரங்கத்தை இயக்க  மிக முக்கியமான ஒப்பந்தத்தை அதன் துணை நிறுவனமான காரே பால்மா II கோலினரிஸ் பிரைவேட் லிமிடெட்ட நிறுவனத்துடன் இணைந்து மகாராஷ்டிரா மாநில மின்சார உற்பத்தி நிறுவனத்திடம் கைப்பற்றியுள்ளது.

இது சுமார் 34 வருடம் காலம் கொண்ட மாபெரும் ஒப்பந்தமாகும். ராய்கர் மாவடத்தில் இருக்கும் நிலக்கரி சுரங்கத்தில் இருந்து ஆண்டுக்கு 23.6 மில்லியன் டன் நிலக்கரி ஒவ்வொரு வருடமும் உற்பத்தி செய்யப்படுகிறது.

அடுத்து, பாதுகாப்புத் துறை சார்ந்த தயாரிப்புகளை இந்திய நிறுவனங்களே தயாரிக்க வேண்டும் என்றபோது அதானி பாதுகாப்பு கருவிகளைத் தயாரிக்கும் நிறுவனத்தைத் தொடங்கினார்.

2015-ம் ஆண்டுக்குப் பிறகு ராணுவத்துக்கு பாதுகாப்பு உபகரணங்களை வழங்கும் பணியையும் அதானி குழுமம் தொடங்கியது. சிறிது காலத்திற்குப் பிறகு, இயற்கை எரிவாயு துறையில் அதன் வணிகம் விரிவடைந்தது. 2017-ல் சோலார் பிவி பேனல்கள் தயாரிக்கத் தொடங்கியது.

இந்தியாவில் மும்பை, அகமதாபாத், மங்களூரு, லக்னோ, ஜெய்ப்பூர் மற்றும் திருவனந்தபுரம் ஆகிய 6 விமான நிலையங்களின் பராமரிப்புப் பணிகளும் தனியார்மயமாக்கப்பட்டு, அவை அதானியின் ‘அதானி எண்டர்பிரைசஸ்’ நிறுவனத்துக்கு (Adani Enterprises) வழங்கப்பட்டுள்ளன.

மூன்று வருடங்கள் கழித்து, எரிவாயு துறையை அரசு ஊக்குவித்ததைத் தொடர்ந்து, எரிவாயுவை சில்லரை விற்பனை செய்யும் பெரிய தனியார் நிறுவனமான தன்னை தகவமைத்துக் கொண்டது இந்நிறுவனம்.

சூரிய ஆற்றலையும் அதானி விட்டு வைக்கவில்லை. இந்தியாவிலேயே அதிக அளவில் சோலார் மின்சாரத்தை தயாரிக்கும் நிறுவனங்களில், அதானி க்ரீன் நிறுவனம்தான் முதலிடத்தில் உள்ளது.

தமிழ்நாட்டின் ராமநாதபுரம் மாவட்டத்தின் கமுதியில் தான், 2500 ஏக்கர் நில பரப்பில், உலகின் மிகப் பெரிய சோலார் உற்பத்தி நிலையத்தை அமைத்திருக்கிறார் கெளதம் அதானி.

– இப்படி நாம் பட்டியல் போட்டுக்கொண்டே போகலாம்.

2020 ஆம் ஆண்டு 8.9 மில்லியன் டாலராக இருந்த அவரது சொத்து மதிப்பு 2022 ஆம் ஆண்டு ஜனவரியில் 89 பில்லியன் டாலராக உயர்ந்தது. குறிப்பாக 2021 ஆம் ஆண்டில் அதானின் ஒரு நாள் வருமானம் மட்டும் ஆயிரம் கோடியாக இருந்தது.

கடந்த 15 ஆண்டுகளில் அதானியின் வளர்ச்சி அபரிதமாக இருந்துள்ளது. 2006-07 நிதியாண்டில் அதானி குழுமத்தின் வருமானம் ரூ.16,953 கோடி. இதில் கடன் மட்டும் ரூ.4,353 கோடி. இதுவே 2012-13 நிதியாண்டில், வருமானம் ரூ.47,352 கோடி எனவும் கடன் ரூ.81,122 எனவும் இருந்தது.

மோடி 2014-ல் பிரதமராக பதவியேற்கும் போது அதானியின் நிகர மதிப்பு 7.1 பில்லியன் டாலர்கள். அது தற்போது 137 பில்லியன் டாலர்கள் என்றளவிற்கு உயர்ந்துள்ளது.

(தொடரும்)

நாட்டை நாசமாக்கும் கூட்டாளிகள் – 4

” 2001-ல் அடுத்த கட்டத்தை எட்டினேன். அப்போது குஜராத் மாநில முதல்வராக மோடி இருந்தார். முன் எப்போதும் இல்லாத வகையில் மாநிலத்தில் தொழில் வளங்கள் வளர்ச்சி பெற்றன. அதற்கு அவரது ஆட்சியில் கொண்டு வந்த கொள்கைகள் காரணம்.”- அதானி

2002-ம் ஆண்டு குஜராத்தில் கோத்ரா ரயில் எரிப்புச் சம்பவத்திற்குப் பிறகு, இஸ்லாமியர்களுக்கு எதிராக வன்முறை நிகழ்த்தப்பட்டது. இந்த வன்முறையில் 20,000 இஸ்லாமியர்களின் வீடுகள் மற்றும் கடைகள், 360 மசூதிகள் அழிக்கப்பட்டன. 1.5 லட்சம் மக்கள் வேறு இடங்களுக்கு குடிபெயர்ந்தனர். அரசு தகவலின்படி 790 இஸ்லாமியர்கள் கொல்லப்பட்டனர். கலவரம் தொடர்பாக ஆய்வு மேற்கொண்ட மனித உரிமை அமைப்புகள் இதில் 2,000க்கும் மேற்பட்டோர் கொல்லப்பட்டதாக தெரிவித்தது.

இஸ்லாமியர்கள் மீதான இந்த கொடூர தாக்குதலுக்காக அந்த மாநிலத்தின் முதல்வராக அப்போது இருந்த மோடியை `இந்தியத் தொழில் முனைவோர் கூட்டமைப்பு’ (Confederation of Indian Industry – CII) கண்டித்தது.

இந்தியாவின் வர்த்தக நெட்வொர்க்கின் மிகப்பெரிய கூட்டமைப்பால் மோடி கண்டிக்கப்பட்டபோது, கூட்டமைப்பின் உள்ளிருந்தே அதை எதிர்த்தவர் கௌதம் அதானி. உன் மீது படிந்திருக்கிற ரத்த கறையோடு உன்னை கட்டி தழுவ நான் தயாராக இருக்கிறேன் என்று முதல் நாளாக மோடிக்கு ஆதரவாய் நின்றார்.

குஜராத்தைச் சேர்ந்த சில தொழிலதிபர்களுடன் `குஜராத் மறுமலர்ச்சி குழுமம்’ என்ற வர்த்தகக் கூட்டமைப்பைத் தொடங்கிய அதானி, மோடிக்காக சி.ஐ.ஐ கூட்டமைப்பை விட்டு விலகப்போவதாக பகிரங்கமாக எச்சரிக்கை விடுத்தார். இந்த நிகழ்வுக்குப் பிறகு மோடிக்கும், அதானிக்கும் இடையிலான நட்பு அதிகரித்தது.

2003-ம் ஆண்டு, குஜராத் மாநில அரசு நடத்திய `வைப்ரன்ட் குஜராத்’ என்ற தொழிலதிபர்களுக்கான மாநாட்டில், 15 ஆயிரம் கோடி ரூபாய்வரை முதலீடு செய்யவுள்ளதாக அறிவித்து மோடி உடனான நட்பை ஆழப்படுத்தினார்

மோடி ஆட்சி காலத்தில் குஜராத் கட்ச் வளைகுடாவில் முந்த்ரா பகுதியில் துறைமுகம் விரிவாக்கப்பணிக்காக அதானி குழுமத்திற்கு அனுமதி வழங்கியது . ஏறத்தாழ 14 ஆயிரம் ஏக்கர் நிலம் அதானி குழுமத்திற்கு ஒதுக்கப்பட்டது. ஒரு சதுர மீட்டர் நிலத்திற்கு 1 ரூபாய் முதல் 32 ரூபாய் வரை மட்டுமே வசூலிக்கப்பட்டு நிலம் அளிக்கப்பட்டது.

2005-ம் ஆண்டு, முந்த்ரா கிராமத்தில் கால்நடை மேய்ச்சலுக்காகக் கிராம மக்கள் பயன்படுத்தி வந்த 1,200 ஹெக்டேர் பரப்பளவு கொண்ட நிலம் குஜராத் அரசால் கையகப்படுத்தப்பட்டு, அதானி குழுமத்திற்குச் `சிறப்புப் பொருளாதார மண்டலமாக’ அளிக்கப்பட்டது. சிறப்புப் பொருளாதார மண்டலமாக அளிக்கப்படும் நிலங்களில் தொடங்கப்படும் தொழிற்சாலைகளுக்கு வரி விலக்கு, மானிய விலையில் மின்சாரம் முதலான சலுகைகள் உண்டு.

இது மற்ற நிறுவனங்களுக்கு வழங்கப்பட்டதை விட மிகவும் மலிவானது. டாடா மோட்டார்ஸ் அதன் நானோ கார் ஆலைக்கு 1,110 ஏக்கர் சனந்தில் (அகமதாபாத் அருகே) ஒரு சதுர மீட்டருக்கு 900 ரூபாய்க்கு வழங்கப்பட்டது.

ஃபோர்டு இந்தியா ஒரு சதுர மீட்டருக்கு ரூ. 1,100 செலுத்தியது, இந்தியாவின் மிகப் பெரிய கார் தயாரிப்பு நிறுவனமான மாருதி சுஸுகி, ஹன்சல்பூரில் உள்ள 700 ஏக்கரை ஒரு சதுர மீட்டருக்கு 670 ரூபாய்க்கு வாங்கியது.

ரஹேஜா கார்ப் ஒரு சதுர மீட்டர் நிலம் ரூ 470 க்கு விற்கப்பட்டது, அதே நேரத்தில் டி.சி.எஸ். ஒரு சதுர மீட்டருக்கு 1,100 ரூபாய் மற்றும் டோரண்ட் பவர் ஒரு சதுர மீட்டருக்கு 6,000 ரூபாய்க்கு செலுத்த வேண்டியிருந்தது. அதை போல் எந்த பிரச்சனையும் இல்லாத நிலமும் வழங்கப்பட்டது.

2012-ல் நடத்தப்பட்ட விசாரணைக்குப் பிறகு, முந்த்ரா திட்டத்தின் போது சுற்றுச்சூழல் மீறல்களுக்காக அதானி குழுமத்தின் மீது UPA அரசாங்கம் 200 கோடி ரூபாய் அபராதம் விதித்ததை பின்னாளில் மோடி அரசாங்கம் இந்த அபராதத்தைத் தள்ளுபடி செய்தது.

ஒரு சதுர மீட்டர் நிலத்தை 1 ரூபாய்க்குப் பெற்ற அதானி, அரசு பொதுத்துறை நிறுவனமான இந்தியன் ஆயில் நிறுவனத்துக்கு அதே நிலத்தை, ஒரு சதுர மீட்டர் 600 ரூபாய் என்ற மதிப்பில் வாடகைக்கு அளித்தார். துறைமுகம், சிறப்புப் பொருளாதார மண்டலம் என்று, அதானியின் சொத்து மதிப்பு பெரும் பாய்ச்சலை நிகழ்த்தியது.

2012 காலகட்டத்தில் மோடி குஜராத் முதல்வராக இருந்தபோது இரண்டு முக்கிய குற்றச்சாட்டுகளை முன்வைத்து சிஏஜி ஒரு ஆய்வறிக்கையை வெளியிட்டது. அது, குஜராத் அரசு பெட்ரோலிய நிறுவனத்திடமிருந்து இயற்கை எரிவாயுவை வெளி சந்தையில் வாங்கி, வாங்கிய விலையை விட குறைந்த விலைக்கு அதானி நிறுவனத்திற்கு விற்றது. இதன் மூலம் அந்நிறுவனம் 70.5 கோடி ரூபாய் லாபமடைந்தது. 2009-12 இடையே ஒப்பந்தபடி குஜராத் அரசு மின் நிறுவனத்திற்கு வழங்க வேண்டிய மின்சாரத்தை அதானி மின் நிறுவனம் வழங்காததால் 240 கோடி தண்டம் வசூல் செய்ய வேண்டிய இடத்தில் வெறும் 79.8 கோடி மட்டுமே மோடி அரசு வசூல் செய்தது.

2009 – 10-ம் ஆண்டில் மட்டும் அதானி தனித் தனி தொழிலுக்கு மொத்தம் 11 கம்பெனிகளைத் தொடங்கினார்.

குஜராத்தில் 2012-ம் ஆண்டு நாட்டிலேயே மிகப்பெரிய சோலார் மின் உற்பத்தியை அதானி தொடங்கினார்.

“குஜராத்தில் மோடி ஆண்ட 2002-2014 காலகட்டத்தில் மட்டும் ரூ. 3,000 கோடியிலிருந்து ரூ. 40,000 கோடியாக அதானி குழுமத்தின் சொத்து மதிப்பு உயர்ந்தது.

அதானியின் தொழில் குஜராத்திற்கு வெளியே, பல மாநிலங்களில் கால் பதிக்கத் தொடங்கியது. இந்தச் சூழலில், 2014 நாடாளுமன்றத் தேர்தலில் நரேந்திர மோடி பிரதமர் வேட்பாளராக அறிவிக்கப்பட்டார். தேர்தல் பிரசாரங்களுக்கு, அதானி குழும விமானங்களில் பயணித்து வாக்கு சேகரித்தார்.

2014-ம் ஆண்டு, மே 16 அன்று, பி.ஜே.பியின் வெற்றி அறிவிக்கப்பட்டு, மோடி பிரதமராகத் தேர்ந்தெடுக்கப்பட்டார். அதே நாளில், அதானி குழுமம் ஒடிசாவின் தம்ரா துறைமுகத்தை 6,000 கோடி ரூபாய்க்கு வாங்குவதாகப் பெருமையாக அறிவித்தது.

மோடியும் பிரதமர் வேட்பாளரில் இருந்து பிரதமராக பதவி ஏற்றார். அதானியும் உள்ளூர் முதலாளியிலிருந்து உலக கார்ப்பரேட்டாக உருவெடுத்தார்.

(தொடரும்)

” 1995-ல் மூன்றாவது கட்டத்தை எட்டினேன். அதற்கு முதல் காரணம் அப்போதைய குஜராத் மாநில முதல்வர் கேஷூபாய் படேல். அவர் தொலைநோக்கு பார்வை கொண்ட வளர்ச்சி சார்ந்த கொள்கைகளை கொண்டு வந்தார். அதில் கடலோர வளர்ச்சிகளும் அடங்கும். அதுதான் முதல் துறைமுகத்தை நிறுவ தூண்டியது ” – அதானி

1991 இல் புதிய பொருளாதாரக் கொள்கை விளைவாக துறைமுகங்கள் தனியார் கைகளுக்கு போய் சேர தொடங்கியது.

1994ல் குஜராத் அரசு புதிய துறைமுகங்களை அரசு மற்றும் தனியார் நிறுவனங்களின் கூட்டு முயற்சியாக நிர்வகிக்க முடிவு செய்தது. முந்த்ரா துறைமுகத்தின் பெயர் உட்பட 10 துறைமுகங்களின் பட்டியலை அது முடிவு செய்தது.

முந்த்ரா துறைமுகத்தின் பொருளாதார முக்கியத்துவம் காரணமாக, குஜராத் அரசு முந்த்ரா துறைமுகத்தின் நிர்வாக அவுட்சோர்சிங்கை அறிவித்தது, மேலும் 1995 இல் ஒப்பந்தம் அதானி குழுமத்திற்கு வழங்கப்பட்டது. முதல் கப்பல் 1998 இல் முந்த்ரா துறைமுகத்தில் நிறுத்தப்பட்டது.

அதானி துறைமுகங்கள் மற்றும் சிறப்பு பொருளாதார மண்டலங்கள் ஒரு தசாப்தத்திற்கும் மேலாக 71 விழுக்காடு செயல்பாட்டு வரம்பை எட்டியுள்ளன. ஹசிரா துறைமுகத்தில் எல்என்ஜி அல்லாத முனையத்தை உருவாக்க அதானி குழுமத்தை சிட்டி பேங்க் தேர்வு செய்தது. 2009ல் டெண்டர் எடுக்கப்பட்டு, 2010ல் கட்டுமானம் துவங்கியது. துறைமுகம் 2012ல் செயல்பட துவங்கியது.

தற்போது, அதானி நிறுவனம் ஆந்திராவிலுள்ள கிருஷ்ணபட்டிணம் துறைமுகத்தின் 25 சதவீத பங்குகளை ரூபாய் 2,800 கோடிக்கு வாங்கியுள்ளது. இதனால் அத்துறைமுகத்தில் அதானி நிறுவன பங்குகள் 75 சதவீதத்திலிருந்து 100 சதவீதமாக உயர்ந்திருக்கிறது.

இந்தியாவின் மிகப்பெரிய துறைமுக நிறுவனமான அதானி நிறுவனத்தின் வசம், குஜராத்தில் முந்த்ரா, தஹேஜ், டுனா மற்றும் ஹசிரா, ஒடிசாவில் தம்ரா, கோவாவில் மோர்முகாவோ, ஆந்திராவில் விசாகப்பட்டினம் மற்றும் கிருஷ்ணபட்டணம், மகாராஷ்டிராவில் டிகி மற்றும் சென்னையில் கட்டுப்பள்ளி மற்றும் எண்ணூர் ஆகிய 12 துறைமுகங்கள் உள்ளன. இவை நாட்டின் மொத்த துறைமுகத் திறனில் 24 சதவீதத்தைக் கொண்டுள்ளன.

துறைமுகங்கள் வெறும் சரக்கு ஏற்றுமதி இறக்குமதி செய்யும் இடமாக மட்டும் அது இருக்கவில்லை. போதை பொருளின் மையமாக இருக்கிறது.

குஜராத்தில், கடந்த 2021, செப்டம்பர் 16ஆம் தேதி, பெருந்தொழிலதிபர் அதானிக்கு சொந்தமான முந்த்ரா துறைமுகத்தில், சுமார் 21,000 கோடி ரூபாய் மதிப்பிலான 3,000 கிலோ ஹெராயின் போதைப்பொருள் பிடிபட்டது. இந்திய வரலாற்றிலேயே ஒரே சம்பவத்தில் இவ்வளவு பெரிய அளவில் போதைப்பொருள் பிடிபட்டிருப்பது இதுவே முதன்முறையாகும்

அதேபோல், கடந்த 2022, மே மாதத்தில் அதே அதானியின் முந்த்ரா துறைமுகத்தில், ரூ.500 கோடி மதிப்புள்ள 56 கிலோ எடைகொண்ட கொக்கைன் போதைப் பொருளை வருவாய் புலனாய்வு பிரிவினர் பறிமுதல் செய்தனர். அடுத்ததாக, கடந்த ஜூலை 12ஆம் தேதி, ரூ.350 கோடி மதிப்பிலான 70 கிலோ ஹெராயின் போதைப்பொருளை அதே முந்த்ரா துறைமுகத்தில் கைப்பற்றினார்கள். .

கடந்த ஏப்ரல் 20ஆம் தேதி, குஜராத்தின் ஹட்ச் மாவட்டத்திலுள்ள பழமையான துறைமுகமான கண்ட்லா துறைமுகத்தில், ரூ.1,439 கோடி சர்வதேச சந்தை மதிப்புள்ள 205.6 கிலோ ஹெராயின் கைப்பற்றப்பட்டது.

2021, நவம்பர் மாதத்தில் குஜராத்தின் தேவபூமி துவாரகா மாவட்டத்தில் மூன்று நபர்களிடமிருந்து ரூ.313.25 கோடி மதிப்புள்ள ஹெராயின் மற்றும் மெத்தம்பேட்டமைன் போதைப் பொருட்களை போலீசார் கைப்பற்றினர். கடந்த ஜூன் மாதம், ஒடிசாவிலிருந்து டிரக்கில் கடத்தி வரப்பட்ட ரூ.1.45 கோடி மதிப்பிலான 724 கிலோ கஞ்சாவை குஜராத் மாநிலம் சூரத் நகரில் வைத்து போதைப்பொருள் தடுப்புப் பிரிவினர் கைப்பற்றினர்.

போதைப்பொருள் கடத்தல் தொழிலின் மையப்புள்ளியாக மாறியிருக்கிறது குஜராத். கடந்த ஐந்து ஆண்டுகளில் மட்டும் அங்கே 2.5 லட்சம் கோடி ரூபாய் மதிப்பிலான போதைப்பொருள்கள் பிடிபட்டிருக்கின்றன.

ஆப்கன் உள்ளிட்ட பிற நாடுகளிலிருந்து குஜராத்துக்குக் கடத்திவரப்படும் போதைப்பொருள்கள் கைப்பற்றப்படும் முக்கிய இடமாக இருப்பது அதானியின் முந்த்ரா துறைமுகம் தான்.
இது குஜராத்தின் பட்ஜெட்டைவிட அதிகம்.

சி.பி.ஐ, அமலாக்கப்பிரிவு, மத்திய போதைப்பொருள் தடுப்பு ஏஜென்சிகள் கண்டும் காணாமல் இருக்கின்றன.

குஜராத் உள்துறை அமைச்சர் ஹர்ஸ் சங்க்வி தொகுதியில் மட்டும் மூன்று போதை பொருட்கள் தயாரிக்கும் தொழிற்சாலைகள் உள்ளன என்பது குறிப்பிடத்தக்கது. இதில் சம்பாதிக்கும் அதானியின் சொத்துகள் எல்லாம் கணக்கில் வருவதில்லை.

ஏனென்றால் இந்திய பிரதமர் மோடியை நட்பாய் பெற்றவருக்கு இது கூட கிடைக்கவில்லை என்றால் அது நியாயமாகாது அல்லவா ?

(தொடரும்)

1988ஆம் ஆண்டு தன் சகோதரர்களில் ஒருவரின் பிளாஸ்டிக் ஆலையை நிர்வகிக்க குஜராத் வந்து, தனக்கென சொந்தமாக அதானி எண்டர்பிரைசஸ் என்ற ஒரு வணிக நிறுவனத்தைத் தொடங்கினார். ஆனால், இன்று

இந்தியாவிலேயே சுமார் 300 கிலோமீட்டர் நீளத்துக்கு தனியார் ரயில் பாதைகளைக் கொண்டிருக்கும் ஒரே நிறுவனம் அதானியுடையது தான்.

அதே போல இந்தியாவிலேயே மிகப் பெரிய தனியார் அனல் மின் நிலையம் வைத்திருக்கும் நிறுவனமும் அதானி குழுமம்தான்.

இந்தியாவிலேயே அதிக அளவில் சோலார் மின்சாரத்தை தயாரிக்கும் நிறுவனங்களில், அதானி க்ரீன் நிறுவனம்தான் முன்னிலையில் உள்ளது.

2013-ம் ஆண்டுவரை குஜராத் மாநிலத்தை மையமாகக் கொண்டே செயல்பட்டு வந்த அதானி, இன்று இந்தியா முழுவதிலும் 22 மாநிலங்களில் தங்கள் ஆக்டோபஸ் கால்களை பரப்பியுள்ளது.

இந்தியாவின் இரண்டாவது பெரிய சிமென்ட் நிறுவனத்தை நடத்துகிறார்.

நாட்டின் மிகப்பெரிய துறைமுகமான முந்த்ரா உட்பட 13 துறைமுகங்கள் மற்றும் ஏழு விமான நிலையங்களை நடத்துகிறார். மேலும், டெல்லிக்கும் மும்பைக்கும் இடையே இந்தியாவின் மிக நீளமான விரைவுச் சாலையை உருவாக்கி வருகிறார்.

இன்றைய தேதியில் இந்தியாவின் சுமார் 260 நகரங்களில் அதானி குழுமம், தனது ஏதோவொரு தொழில் நிறுவனத்தை இயக்கி வருகின்றது. நிலக்கரி துரப்பணம் மற்றும் வணிகம், துறைமுகங்கள், மின்சாரம் மற்றும் எரிவாயு உற்பத்தி மற்றும் பகிர்மானம், சமையல் எண்ணெய் உள்ளிட்ட விவசாயப் பொருட்கள், கட்டுமானத்துறை, நிதி நிறுவனங்கள், பொதுப் போக்குவரத்து மற்றும் பாதுகாப்புத் துறைக்கான ஆயுத உற்பத்தி என அதானி குழுமம் கடந்த வெகுசில ஆண்டுகளிலேயே தனது ஆக்டோபஸ் கரங்களால் இந்தியாவை விழுங்கிக் கொண்டிருக்கிறது.

அதானியின் வளர்ச்சியை வெறும் மோடியுடன் மட்டும் நாம் பார்த்து விடக்கூடாது. அதானியின் வளர்ச்சியை அரசின் பொருளாதாரக் கொள்கையோடு ஒப்பிட்டு பார்க்க வேண்டும். அதை அதானின் நேர்காணலோடு ஒப்பிட்டு புரிந்து கொள்ளலாம்

” எனது தொழில் பயணத்தை மொத்தம் நான்கு கட்டங்களாக பிரிக்கலாம். நான் சொல்வது அனைவருக்கும் கொஞ்சம் சர்ப்ரைஸ் ஆக இருக்கலாம். ஆனால், இதுதான் நிஜம். எனது ஏற்றுமதி தொழில் வளர்ச்சிக்கு ராஜீவ் காந்தி ஆட்சியின்போது கொண்டுவரப்பட்ட கொள்கைகள் முக்கிய காரணமாக இருந்தன.

1991-ல் அப்போதைய பிரதமர் நரசிம்ம ராவ் மற்றும் மன்மோகன் சிங் கொண்டு வந்த பொருளாதார சீர்திருத்தங்கள் மூலம் தொழில் சார்ந்தவர்கள் பலன் அடைந்தனர். அதில் நானும் ஒருவன்.” இன்று தனியார் சேனலுக்கு கொடுக்கப்பட்ட பேட்டி ஒன்றில் இப்படி அதானி தெரிவித்துள்ளார்.

அதானி சொல்லும் அரசின் கொள்கைகள் என்ன? அதனால் அதானி உள்ளிட்ட முதலாளிகள் அடைந்த லாபம் என்ன ?

1947 இல் இருந்து 1991 வரைக்கும் பின்பற்றப்பட்டு வந்த இந்திய அரசின் பொருளாதாரக் கொள்கையில்
( சோசலிச பாணியில் நம் இந்தியப் பொருளாதாரம் செல்ல வேண்டும் என்று விரும்பினார் இந்தியாவின் முதல் பிரதமரான ஜவஹர்லால் நேரு)1991 க்கு பிறகு பெரும் மாற்றங்கள் கொண்டுவரப்பட்டது.

அந்த மாற்றம் தான் அதானி உள்ளிட்ட பெரும் முதலாளிகளுக்கு கொள்ளை லாபத்தை ஈட்டி தந்தது.

1991 முதல் 1996 வரை மத்தியில் ஆட்சி புரிந்த திரு பி. வி. நரசிம்ம ராவ் தலைமையிலான காங்கிரஸ் அமைச்சரவை புதிய பொருளாதாரக் கொள்கைகளை அமல்படுத்த ஆரம்பித்தது. அதை முன் நின்று நடத்தியவர் அப்போது நிதி அமைச்சராக பணி புரிந்த மன்மோகன் சிங். .

இந்திய மற்றும் வெளிநாட்டு முதலாளிகள் மீதான கட்டுப்பாடுகளை முற்றிலும் நீக்கி அவர்கள் தங்கு தடையின்றி இந்தியாவிற்குள் தொழில் தொடங்குவதற்கு ஊக்குவிப்பதும், பொதுத்துறை நிறுவனங்களின் பங்குகளை/அல்லது பொதுத்துறை நிறுவனங்களைத் தனியாருக்கு விற்பதும், அரசின் பொறுப்பு என்று கருதப்படும் கல்வி, சுகாதாரம் போன்ற துறைகளைத் தனியாரிடம் ஒப்படைத்து, லாபத்தின் அடிப்படையில் அவற்றைச் செயல்படுத்துவதும் இதன் அடிப்படை.

நிதி வடிவில் மூலதனம் நாட்டுக்குள்ளே வருவதையும் அதன் விருப்பப்படி நாட்டை விட்டு வெளியே செல்வதையும் தங்கு தடையில்லாமல் அனுமதிப்பதை உறுதி செய்வது தான் இந்தக் கொள்கை வடிவம்.

புதிய பொருளாதாரக் கொள்கை தனியார்மயம் , தாராளமயம் உலகமயம் என மூன்று வடிவங்களில் செயல்படுத்தப்பட்டது.

தனியார் நிறுவனங்களுக்கு பொதுத்துறை பிரிவுகளின் பங்குகள் விற்பனை செய்யப்பட்டது.

பொதுத்துறை உரிமைகளை தனியார் நிறுவனங்களுக்கு விற்பனை செய்யப்பட்டது.

அனைத்து வங்கிகளாலும் கடன் அள்ளி வழங்கப்பட்டது.

இந்திய தொழில்கள் மூலப்பொருட்கள் மற்றும் மூலதன பொருட்களை இறக்குமதி செய்வதற்கான கட்டுப்பாடு தளர்த்தப்பட்டது.

அரசு கட்டுப்பாடுகள் ஏதுமின்றி தனியார் நிறுவனங்கள் செயல்பட அனுமதி வழங்கப்பட்டது.

பன்னாட்டு நிறுவனங்களுக்கு எவ்வித கட்டுப்பாடும் இன்றி இந்திய சந்தை திறந்து விடப்பட்டது.

எவ்வித கட்டுப்பாடும் இல்லாமல் எல்லாத் துறைகளிலும் பன்னாட்டு நிறுவனங்கள் இறங்குவதற்கான வாய்ப்பு வழங்கப்பட்டது.

குறிப்பாக, 1996 ஆம் ஆண்டில் நிலக்கரியை அடிப்படையாகக் கொண்ட மின் திட்டங்கள் நீர்மின் திட்டங்கள் மரபுசாரா ஆற்றல் மூலாதாரத்தை அடிப்படையாகக் கொண்ட திட்டங்கள் ஆகியவற்றில் நூறு விழுக்காடு அந்நிய முதலீட்டுக்கு உடன் ஒப்புதல் வழங்குவது என ஆற்றலுக்கான அமைச்சகம் முடிவு செய்தது.

1996 அக்டோபரில் துறைமுகத்துறையில் தனியார் முதலீட்டுக்கு அரசாங்கம் அனுமதித்தது 74% அந்நிய முதலீட்டுக்கு உடனடியாக அனுமதி வழங்கப்பட்டது.

பொதுத்துறை நிறுவனங்களை தனியார் மயமாக்கும் பட்டியல் தயார் செய்யப்பட்டது.

சுரங்கத் தொழில்களிலும் தனியார் முதலாளிகள் ஈடுபட வழிவகை செய்யப்பட்டது. இப்படி எல்லா துறைகளும் நாட்டின் பாதுகாப்பு சார்ந்த 18 துறைகள் தவிர்த்து, அனைத்தும் தனியார் முதலாளிகளுக்குத் திறந்து விடப்பட்டது.

இந்தியப் பெருமுதலாளிகளின் சொத்துகள் பல மடங்கு உயரத் தொடங்கின. டாட்டா குழுமத்தின் சொத்து 1990-ல் ரூ.10,922 கோடி. 2012-13-ல் இது ரூ.5,83,554 கோடியாக உயர்ந்தது. இதேபோல, அம்பானி குழுமத்தின் சொத்துகள் ரூ.3167 கோடியிலிருந்து ரூ.5,00,000 கோடியாக உயர்ந்தது.

முதன் முதலில் பட்டியலிட்ட அதானி எண்டர்பிரைசஸ் நிறுவன பங்கின் விலை கடந்த 1994-ல் 150 ரூபாயாக இருந்தது, கடந்த மார்ச் 2020 நிலவரப்படி 75,000 ரூபாயாக இருக்கிறது.

அதானியின் குடும்பம் உலக கோடிஸ்வரர்களின் பட்டியலுக்கு வந்து சேர்த்தது. அதே நேரம், ஏழை, பணக்காரர்களிடம் மிகப் பெரிய இடைவெளியை தாராளமயமாக்கல் அதிகமாக்கியது.

(தொடரும்)

அமெரிக்காவின் பிரபல ஆய்வு நிறுவனமான ஹிண்டன்பர்க் ” அதானி குழுமம் பல்வேறு மோசடிகளில் ஈடுபட்டு தமது பங்கு விலைகளை மிக அதிக அளவுக்கு விலை ஏற்றி உள்ளதாகத் தெரிவித்துள்ளது.

பல்வேறு நாடுகளிலிருந்து போலியாக கம்பெனிகளைத் தோற்றுவித்து அதன் பங்குகளை விலை ஏற்றியதாகப் பல்வேறு சான்றுகளை அந்த ஆய்வறிக்கையில் வெளியிட்டுள்ளது.

அதானி குழுமத்தில் பெரும்பாலான பங்குகள் அந்த நிறுவனத்தின் குடும்பத்தைச் சார்ந்த நபர்களிடம் மட்டும் இருப்பதாகவும் மேலும் , வரவு செலவு அறிக்கையில் மோசடி, வரி ஏய்ப்பு, மோசடியாக பண பரிமாற்றம், போலியான பெயரில் நிறுவனங்கள், உறவினர்களை பயன்படுத்தி போலியான பரிவர்த்தனை அறிக்கை” என பல குற்றச்சாட்டுகளை, அதானி குழுமத்தின் மீது முன்வைத்துள்ளது .

இந்த நிலையில் ஹிண்டன் பர்க் அறிக்கை மூலம் புதன்கிழமை ஒரு நாள் வர்த்தகத்தில் மட்டும் சுமார் 55 ஆயிரம் கோடி ரூபாய் சந்தை மதிப்பீட்டை அதானி குழுமம் இழந்து முதலீட்டாளர்களுக்குப் ( பெரும் பணக்காரர்கள் மட்டும் என்று நினைத்து விட வேண்டாம், நடுத்தர வர்க்கமும்) பெரும் பாதிப்பை ஏற்படுத்தியது.

அதானி குழுமமோ இந்த குற்றச்சாட்டுகள் ஆதாரமற்றவை. இது தவறான தகவல். இது எங்களின் வளர்ச்சியில் தாக்கத்தினை ஏற்படுத்தும் விதமாக வந்த அறிக்கை. எங்களின் வீழ்ச்சியில் ஹிண்டர்ன்பர்க் பலனடைய பார்க்கின்றது. முதலீட்டாளர்கள் எங்கள் மீது வைத்துள்ள நம்பிக்கையை குறைக்க பார்க்கிறது என்று அதானி சார்பில் கூறப்பட்டுள்ளது.

உலக பணக்காரர்கள் வரிசையில் மூன்றாவது இடம்பிடித்த அதானி தற்போதைய ஹிண்டர்ன்பர்க் அறிக்கையால் ஏழாவது இடத்திற்கு தள்ளப்பட்டுள்ளார்.

மோடி குஜராத் முதல்வரான பின்புதான், அதானியின் தொழிலும் வணிகமும் உயரப் பறக்கத் தொடங்கிது.குஜராத்தின் முந்த்ரா துறைமுகத்தை நிர்வகிக்கும் ஒப்பந்தத்தைப் பெற்றபின்பு தான் அவருடைய வளர்ச்சி வேகம் பிடித்தது.

மோடியின் நெருக்கத்தால் மட்டுமே அதானி குழுமம் மீண்டும் மீண்டும் அரசாங்கத்தின் மூலம் பெரும் லாபத்தை கடனாகவும், கடன் தள்ளுபடி மூலமும் பெற்று வருகிறது. எனவே இந்த மோசடியை வெறும் அதானி யோடு மட்டும் பார்க்க கூடாது. ஹிண்டன் பர்க் முன் வைக்கும் மோசடியில் மோடியின் பங்கு முக்கியமானது.

முதலாளிகளுக்கும் அரசியல்வாதிகளுக்கும் இடையான கூட்டு எல்லோரும் அறிந்தது தான். காங்கிரசுக்கும் அதானிக்கும் கூட கூட்டு உண்டு தான். ஆனால் அதானி – மோடியின் கூட்டு அதற்கும் மேலானது.

குஜராத்தில் 2012-ம் ஆண்டு நாட்டிலேயே மிகப்பெரிய சோலார் மின் உற்பத்தியை அதானி தொடங்கி கார்ப்பரேட் உலகில் ஆழமாகக் கால்பதித்தார். நாட்டில் எந்த கம்பெனி விற்பனைக்கு வந்தாலும் அதை அதானி விலைக்கு வாங்க ஆரம்பித்தார்.

2014-ம் ஆண்டு அதானியின் சொத்து 7.1 பில்லியன் டாலராக இருந்தது.

2020-ம் ஆண்டு அதானியின் சொத்து 10 பில்லியன் டாலராக உயர்ந்தது. ஆனால், பங்குச் சந்தையில் நடந்த கிடுகிடு வளர்ச்சி காரணமாக அவரின் சொத்து 2022-ம் ஆண்டு 152 பில்லியன் டாலர் அளவுக்கு அதிகரித்து இருக்கிறது. இந்த வளர்ச்சியை தான் மோசடி என்று ஹிட்டன் பர்க் குற்றம் சாட்டுகிறது.

ஹிட்டன் பர்க் நிறுவனம் சரியானது என்று நாம் கூறவில்லை. ஹிட்டன் பர்க்கின் உள்நோக்கம் குறித்து நாம் கவலை கொள்ளவில்லை. அவர்கள் முன் வைத்துள்ள இந்த குற்றச்சாட்டின் தன்மையை நம்முடைய கண்ணோட்டத்தில் புரிந்து கொண்டு இந்தக் கூட்டணி நாட்டை எப்படி திவால் ஆக்கிக் கொண்டிருக்கிறது என்பதை நாம் விரிவாக ஆய்வு செய்ய வேண்டும்.

அதானியின் வளர்ச்சியை வெறும் மோடியோடு மட்டும் நாம் பார்க்கவில்லை. தனியார்மயம், தாராளமயம், உலகமயமாக்களின் விளைவு தான் அதானியின் வளர்ச்சி. 1991 களில் காங்கிரஸ் தொடங்கி வைத்த உலகமயமாக்களின் போதே அதானியின் வளர்ச்சியும் , அம்பானி வளர்ச்சியும் தொடங்கிவிட்டது.

மோடி குஜராத் முதல்வராக இருந்த போதும் இந்தியாவின் பிரதமராக உயர்ந்த பின்பும் அதானி எப்படி நடுவன் அரசைக் கைக்குள் வைத்துக்கொண்டு வங்கிகளில் கடன் பெற்று , அரசின் கொள்கையை தனக்கு சாதகமாக மாற்றி உலகக் கோடீஸ்வரராக மாறினார் என்பதும் அதன் மூலம் எப்படி இந்தியா திவாலாகி கொண்டிருக்கிறது என்பதையும் ,ஏழை எளிய மக்கள் கடும் நெருக்கடி சந்தித்துக் கொண்டிருக்கிறார்கள் என்பதும் பழங்குடிகள் காடுகளில் இருந்து வெளியேற்றப்பட்டு கொண்டிருக்கிறார்கள் என்பதையும் நாம் விரிவாக பார்க்கலாம்.

க. இரா.தமிழரசன்

(தொடரும்)